Profil de Bianca心靈地帶PhotosBlogListesPlus  |  Outils Aide |
|
16/12/2008 諗埋今晚, 唔會再為一個對我已經唔重要既人唔開心今晚訓極都訓唔著, 因為又諗返上個星期一發生既事...
本來果日阿姨黎到係一件好開心既事, 點知我EQ太低比佢激到我o係酒樓咁多人既公眾場所大吵大鬧. 雖然話就話大庭廣眾唔應該失禮人, 但呢個星期我諗左超過十次都覺得如果再返去當時既情景我都一樣會係咁, 比一個親人咁樣話法我真係忍唔到
我承認我係一個好計較既人, 因為如果我似我老豆咁無所謂就乜事都唔會發生. 越諗就越掛住媽咪, 如果佢仲o係度就好...
...
令我o係酒樓坐低唔夠十分鐘就又喊又鬧係佢竟然翻抄上一年大家已經嘈過既家用問題. 無錯, 又係一個錢字. 經過左一年, 大家應該成熟左, 我估唔到佢仲係咁無知...
06年媽咪唔o係度時佢仲o係日本讀緊書, 暑假返到黎仲要讀多一年, 話就話最後一年學費自己比, 亦都無再問屋企攞錢用. 我唔會覺得佢好識諗, 因為去日本前媽咪已經比左d錢佢, 最後一年學費根本就唔係問題, 做下part time賺零用錢本來就係好應該既事, 係因為媽咪太鍚我地, 而佢又覺得係奉旨. 其實我知道我已經幸福過好多好多人, 雖然以前都係食屋企住屋企, 但我中學畢業之後咁多年都無再問媽咪攞過錢用, 佢仲成日問我夠唔夠錢洗, 我咁鍾意錢都無要過
之後07年頭開始佢未讀完書就識左而家既女朋友, 好快就叫埋佢返黎屋人一齊住. 屋企得返我同阿爸做野, 你估我地有錢人咩, 咁都算, at least我同呢個女仔都相處得幾好, 有多個人間屋又多d生氣, 但對我無影響, 但對其他人有影響嘛. 黎左一個月唔夠嫻姐已經日日同我呻話要做多一個人既野, 咁佢咁諗都係好正常, 我早幾年出左去住時媽咪已經減左佢一次人工, 之後佢去埋日本果年又減多次, 而家媽咪唔o係度之後無啦啦全部返哂黎仲要加多個, 比我都出聲啦! 但話哂佢同我地咁多年感情, 佢都唔好意思o係當時話再加返人工.
又再到07年中, 佢終於讀哂佢要讀既書出黎做野, 佢好彩, 經濟好時畢業咪搵到份人工高既工囉, 仲以為自己真係好叻. 佢一搵到工嫻姐就即刻出聲話要加返以前既人工, 咁我都覺得好合理, 因為我之前係唔知佢比媽咪減過, 加返都好應該. 咁樣加一加, 本來多左個人搵錢應該會好d, 但反而要比多d家用, 係因為阿爸+我d微薄既家用真係負擔唔起, 所以要我同佢一齊比多d先得. o係果個時候我已經提出過佢要比大份d, 因為佢搵錢又多過我, 最重點係佢帶多左個人返黎住, 我叫佢比多d都係好合理, 不過最後傾唔掂, 我就算, 一人一半
咁樣又過左幾個月, 我先發覺原來我地兩個一路比既家用其實仲係唔夠, 阿爸個個月仲要出好多先afford到成頭家. 我知阿爸份人又係太好, 太鍚我地, 唔想出聲, 我咪做衰人出聲囉, 叫佢再攞多幾百蚊出黎, 係, 係幾百蚊, 我都覺得好攪笑, 要為幾百蚊嘈, 但我條氣真係唔順, 我幾百蚊請人食飯比阿爸比嫻姐自己買野都未手軟過, 我就係覺得佢地兩個人住比一份家用係好唔識諗, 點知再講呢個話題時佢竟然話多一個人住又點, 用唔到幾多錢, 唔需要比多d, 勁! 其實我唔出聲都得架, 我當睇唔到阿爸辛苦都得架, 我照比返我要出果份錢阿爸都一樣唔會出聲話我~ 就係咁, 上年就為呢個問題第一次同佢吵大獲, 之後因為我既態度好強硬, 佢由之後果個月起就比多左幾百囉.
仲有一樣野我好睇唔過眼我都無鬧佢, 錢都無儲到就要買三十二吋既LCD電視放o係佢間房, 八千幾蚊竟然叫阿爸贊助佢一半, 唉, 佢真係好意思講出聲, 阿爸梗係say yes啦, 我同阿爸講叫佢唔好, 因為佢已經出黎做野, 阿爸唔想我唔開心, 仲話送個比我,
風平浪靜左成年, 大家都以為佢已經明白左, 點知就係上星期一去飲茶時, 我講左一句話而家阿爸退左休啦, 雖然佢仲叫做搵到錢, 但你都應該識做比少少錢阿爸當係心意, 佢一出聲就話比咁少家用就唔好講咁多野之類意思既說話! 咁好明顯即係仲覺得我係屈佢比多d, 而唔係佢應該要比出黎啦! 我不慊其煩解釋多次比佢聽係因為佢地兩個人住所以先要比多d, 佢又係攞返d舊points同我講, 今次仲加埋話我都有帶"佢"黎屋企, 咁我點解唔駛比多d, 人地一餐飯都無o係我地屋企食過, 一晚都無o係度訓過, 黎我屋企hea下都要比錢? 無野駁用埋d咁白痴既野黎講, 呢餐飯真係食唔落
佢仲話我唔知擔起一頭家要幾多開支, 佢話佢平時出左好多錢我唔知, 我真係想笑, 我自己出去住果時佢仲攞緊媽咪d零用錢...之後佢仲講左好多難聽既說話, 就係咁我就無食果餐叫"佢"接左我走
講哂出黎發洩哂, 而家我已經唔嬲, 只係唔想再理呢個人, 佢鍾意點就點啦 07/12/2008 兩日假期本來約左尋日去"吉面", 仲特登攞埋星期一既年假打算o係屋企狂敷mask, 點知遲左要再約下星期先有得做, 算啦, 反正阿姨聽日黎澳門, 咁我個假都唔怕o徙左~
呢排好累, 所以呢兩日真係要好好休息, 因為黎緊年尾一定大把野湧埋黎, 我亦都唔可以再偷懶遲起身返工, 俾人攞黎做話柄就唔好啦, 一定要小心! >_< 04/12/2008 屈機自從上次香港會考之後睇電視先第一次聽到『屈機』呢個所謂香港潮語，但因為我理解能力實在太低，所以始終都係唔明點用, 直至尋日臨放工前......
啱啱出糧又係時候屈K先生請大家食飯！本來"摞"咗成日都唔成功，就o係想放棄之際釗哥突然殺出，知道我地叫緊K先生請食飯就加埋把口話sponser一半，K先生無奈又答應左, 哈！釗哥走左之後K先生佢就話：又俾阿心屈機到！然後又重複：自從阿心嚟咗之後我窮咗好多...=_= 我問其實咩叫屈機，因為點都諗唔明『屈』+『機』點可以用埋一齊，佢地幾個男仔就好詳盡咁解釋俾我聽，原來係打機既用語，屈果部機...終於明白！
【屈機】是一個電子遊戲術語，源自香港，狹義是指玩者利用電子遊戲中的漏洞或不當手段達到目的，廣義是指現實生活中有人利用不正當或不公平的方法達到目的，甚至可以純粹指那些展現強大實力而令對手毫無招架之力的人或行為。
K先生話平時無人屈到佢機，我話每個人都有死敵，嘿嘿... 30/11/2008 納仔婚禮尋日真係超開心!!
因為唔係兄弟姊妹, 所以我參與既過程係由例牌既雀局開始, 至婚禮後既狂歡k局結束...
第一次去MGM飲, 嘩, 外面佈置已經好靚, 設計亦好有心思, 我地一致認為兩位主角搖身一變成為代言人! kenny仲誇張到話"係阿納先帶比我地富豪級既享受"
雀局好短時間, 四圈都打唔哂, 同hie, alan & kenny打, 最攪笑係kenny打到最後一舖先開糊, 一家輸三家, 笑爆咀 XD 不過佢都算好彩, 我地打好細, 比著平時佢咁黑仔起碼做多兩三倍人情啦!
進場之後竟然發現louisa都o係度! 哈哈, 原來佢係michelle同事, 世界真係細.
婚禮過程最難忘係場內既六個大螢幕, 最驚喜係兩位主角既酒店床上照, 勁!
我問: 咦, 張相咁遠影埋黎, 點影呢? 無理由係其他人幫佢地影?
唔記得邊個就答: 陳冠希點影阿納咪點影囉!
(哈哈哈哈哈...全檯爆笑)
婚禮完左之後就去左k局, 亦係全晚既高潮! hb同事等主角到場之後就走哂, louisa又走埋. 得返我一個, 不過唔緊要, 我咁容易同人混熟, 而且有d以前都見過, 大部份都係粵華仔, 熟口熟面, 好快就加入繼續一齊玩! 大家既心情超high, 一路玩到朝早, 7點先返到屋企, 嗌足成晚失哂聲, 到而家把聲都仲怪怪地&有d音發唔到, 好似好耐都無玩到咁癲, 而且好開心係尋晚我既酒後失憶症無發作到, 如果唔係就唔可以記住我呢位好朋友好同事咁開心滿足既時刻~ 28/11/2008 比蚊咬醒呢半個月朝朝都起唔到身返工, 今日真係要多謝呢隻惡蚊, 咬到我手板鬼咁痕, 成個人醒哂~~~! 難得早左起身就記低尋日發生既事...
事緣係前日朝早無端端收到個奇怪短訊, 話我CXM既積分換領申請已經成功左, 可以去南灣間舖度攞M記現金券. 我都無申請, 咁咪打電話去問下, 費事其他人真係申請左又攞唔到嘛. CHECK完一大輪個姐姐話我係我屋企人代我申請既, 仲叫我問下屋企人先...白痴, 我老豆自己D積分都唔記得換野, 點會記得幫我換! 不過費事再質疑, 因為姐姐話其實我D積分已經岩岩過期, 無問佢咁多野分分鐘CUT埋無得換. 收線之後諗清楚, 覺得多數都係W先生幫我換, 人地都係好心, 算啦.
所以尋日中午就去左攞券, 點知期間真係見到W先生, 佢見到我時個樣有少少愕然, 我同佢笑一笑, 佢好COOL咁同我講話幫我REDEEM左D分可以攞野, 我都未講句唔該佢就好趕咁走左去做其他野啦. 佢個LOOK無乜變, 同兩年前9成半相似. 面對一個以前好鍾意同好忍讓既人而家可以一D感覺都無...呢個就係我......
當我諗到呢度, 就會提醒自己根本唔駛為而家既感情太過煩惱, 開開心心過日子就算, 今日唔知聽日事, 個天自有安排.
呢排心情其實唔錯, 最大原因係因為......我既好朋友N先生要結婚啦!!! 恭喜哂~~ 好期待聽晚去MGG見證佢咁高興既時刻!!
哎呀, 又夠鐘換衫返工啦... 26/11/2008 終於換左部古董電腦 ^_^呵呵~ 我部新電腦終於用得啦~
我有呢一日, 一定要多謝出錢既果位仁兄 (雖然未俾哂), 亦要多謝出力既另外兩位仁兄 (雖然未攪掂哂)!!
呢排無乜時間寫blog, 一黎返到屋企要打機, 返到公司又鬼咁多嘢做. 講起多嘢做, 自從調左去hb之後, d工作量真係有增無減~! 不過有樣嘢好攪笑, 話說本來今日打算返屋企睇埋今日未有時間睇既資料, K先生就話: 聽日先睇啦, 你人工唔高唔想俾咁多嘢你做, 長命功夫長命做......哈哈, 經典! 真係估佢唔到!!
16/11/2008 人生如戲岩岩睇完無記41週年既萬千星輝頒獎典禮, 夏雨終於做到視帝, 哈哈, 真好! 我對明星藝員無咩特別愛惡, 邊個攞都無所謂, 不過今次俾jo飽返一次最佳男主角都係好應該既
其實我好羨慕演戲既人, 可以演唔同既角色, 嘗試過唔同既人生 15/11/2008 朋友加油!今日收到你失戀既電話, 我也很難過, 但唔知點樣安慰你...
希望你可以用時間來沖淡一切啦, 放假悶可以找我們出來食飯, 唔開心可以找我們傾計, 記得你仲有一大班支持你既朋友戰友! 加油!!!
06/11/2008 月頭 = 糧尾點解我個個月頭都已經係糧尾!?
呢個問題我個個月都有反省, 但都重複發生!
尋日出糧, 今日去探左個ATM機5分鐘就已經變糧尾...唉~
計落我平常既固定開支都幾多...家用係錢, 減肥又係錢, KEEP住個樣又係錢, 想皮膚好D又係更多錢錢錢...
今日放工有錢在手, 即刻去買返哂未出糧前無錢買既野...嘟嘟卡充值啦, 煙啦, 日用品啦, 護膚品啦, cons啦...點知睇睇下竟然買多兩副眼鏡! 買完之後又有d後悔, 因為而家開始凍, 但我已經無錢買冬天衫lu...哈哈哈(苦笑)
不過都有d開心野: 因為牙醫既高超技術, 有好大機會我本來愁緊八千幾蚊既整牙費可能一蚊都唔駛 (雖然知道呢筆錢遲早要用, 不過捱得一年得一年 hoho)~ 另外本來今個月連衫都無錢買既我無可能今個月換到新電腦打機...但竟然佢話買比我! 唉, 我知其實佢仲無錢過我, 以前我就未必會要, 但而家諗既然佢都唔可以為我做其他野, 我都唔駛幫佢諗咁多, 佢都係想我唔好唔開心, 我無理由唔收~
用錢方式好難改, 每個大使既人都有佢既死穴. 唯一可以做既就係勤力d做野, 起碼個個月都有糧出, 如果好彩有人工加就更加可以舒緩我既經濟... 03/11/2008 第一次出席有"老細"參與的會議我說的"老細"當然不是指公司的老板, 只是部門最高頭目
經常聽說他是一個很麻煩的人, 今日終於領教到! 開完會成個人散哂...
最慘係可以predict到日後還有大把機會散... 31/10/2008 旅遊大使今日竟然做了旅遊大使!
話說睇完牙12點鐘回公司段路中途突然有個鬼佬問我AP1在哪裡有巴士站, 佢趕住搭飛機. 我帶左佢去白鴿bill對面個巴士站睇, 無; 問一個男人, 佢話葡京對出既圓地有, 我帶佢去, 又無; 再問人話原來AP1唔再行呢邊線, 要去到碼頭先有得搭; 佢話想去搭shuttle bus去碼頭再搭AP1, 因為佢得返$2X港幣搭唔到的士; 我帶佢去葡京門口等shuttle bus, 我問佢幾多點機票, 佢話兩點, 送佛送到西, 最後我俾左我出糧前最後的一百蚊佢搭的士...一路順風~
其實問到人話最近碼頭先有得搭巴士去機場時已經想俾錢佢搭的士, 就係因為呢張一百蚊係我今個月謹餘既錢我先考慮咁耐. 算啦, 人在異鄉如果遇到咁既情況一定會好徬徨, 一百幾十可以幫到人, 又令佢對澳門呢個地方留下深刻既印象都算超值. 不過而家諗返, 都唔知佢係咪輸哂d錢所以先無錢搭的士, 哈哈...
呢個鬼佬都幾靚仔架, 三十零歲, 又高, 身型又fit, 德國人但而家住o係曼谷, 不過我唔係因為佢靚仔先咁幫佢, 我返公司之後好認真咁諗過如果問路既係女人我都一樣會咁. 越大越驚睇牙真係好佩服牙醫!
牙醫個鑽的聲音真係好恐怖! 每次睇牙的半小時至一小時基本上我都係處於精神極度tense的狀態!
好似今日我去睇牙, 明明全程都無痛過, 醫生都講明話唔會痛, 但聽到超大既鑽野聲+feel到係鑽緊自己既牙就已經令我陷入極度恐慌的狀態!
有時補牙仲恐怖, 你唔知佢鑽到幾時你會feel到痛仲嚇人!!
真係好羨慕牙牙好健康的人! (都怪自己懶刷牙...)
所以次次睇到 "牙齒陪伴我們一生" 的廣告都好有感觸. 被咬後感被咬日期: 2008/10/26
被咬時間: 晚上8時
被咬地點: 朋友M家
被咬原因: 不詳 (無謂深究狗的思想)
被咬經過: 在打算離開前被牠從後連環突襲兩次
被咬心情: 出奇平靜
被咬後感:
被狗咬個感覺係咁...(很難在這詳述, 感覺已深深刻在腦海裡)
亦原來被狗咬個傷口係唔應該包紮... 以下是醫務人員的解釋:
狗的口水是有很多細菌的, 但這些細菌怕空氣, 所以被咬傷後消毒完便應盡量令傷口通風, 不要用紗布或膠布蓋住傷口, 不然傷口便很容易受細菌感染而發炎.
我包了傷口一晚, 所以醫生幫我打了防疫針之餘還要我吃7天消炎藥...
自從三年前被滾粥燙傷手背, 今次的經驗又再一次證明受了從未受過的傷後一定要先去看看急診, 等專業的醫務人員為我提供治療~
P.S. 順道說說小面積被燙傷後的應急處理: 先立即用流動的水(長開水龍頭)為傷口降溫15-20分鐘, 這樣處理便可大大減低起泡的機會, 之後去看急診等醫務人員幫忙洗傷口和包紮. 22/10/2008 寄情工作&運動九月頭買了一部健身單車, 終於等到去香港那天才送到, 而且等到現在回來才有時間組裝
...
..
.
砌左一個鐘終於攪掂...
朋友HM話運動可以令人開心啲。由今日開始, 希望我朝早日日做野, 返到屋企日日踩單車可以將我唔開心既野發洩哂... 回到家中回到家中是最舒服的~ 呵呵~
去了香港四日，又重左...omg......
次次去香港其實都唔會去好多地方，因為每次主要既目的都係探下我啲屋企人。好幾個月無見阿姨，見到佢同我剛剛一歲的表姨生玩叫婆婆啦~婆婆啦~突然諗起我阿婆，亦真係覺得佢老左好多，而且身體都麻麻地，好彩都唔算太差。
另外，今次去香港跟朋友S去左佢朋友的b'day party，識左啲新朋友仔，算係有別於一般的探親團。雖然又飲大左，唉，算啦，唯有以後再克制啲...
還有聽日最後一日的假期，要好好把握，休息埋聽日又要繼續努力工作！ |
|
|
